Paragraf 2: Rei i ministernan

1. Gobièrnu ta konsistí di Rei i e ministernan.
2. Rei ta inmune; e ministernan ta responsabel.

Ta nombra i retirá promé minister i e demas ministernan mediante dekreto real.

1. Ta instituí ministerio mediante dekreto real. Na kabes di un ministerio tin un minister.
2. Tambe por nombra minister ku no ta enkargá ku maneho di un ministerio.

1. Konhuntamente, e ministernan ta forma konseho di minister.
2. Promé minister ta presidente di konseho di minister.
3. Konseho di minister ta deliberá i tuma desishon riba maneho general di gobièrnu i ta promové unidat di tal maneho.

1. Por nombra i retirá sekretario di estado mediante dekreto real.
2. Un sekretario di estado ta aktua komo minister na lugá di e minister den e kasonan ku e minister konsiderá ku ta nesesario i konforme su instrukshonnan. E sekretario di estado ta responsabel den tal kalidat, sin perhuisio di responsabilidat di e minister.

Rei i un òf mas minister òf sekretario di estado ta firma tur lei i tur dekreto real.

Promé minister tambe ta firma e dekreto real mediante kua ta nombr’é komo tal. Promé minister tambe ta firma e dekretonan real mediante kua ta nombra òf retirá e demas ministernan i e sekretarionan di estado.

Na momento ku e ministernan i e sekretarionan di estado asumí nan kargo, nan ta hasi un huramentu òf deklarashon i promesa di integridat ante Rei, na e manera preskribí den lei, hurando òf primintiendo lealtat na Konstitushon i fieldat den kumplimentu di nan kargo.