Paragraf 1: Rei

E susesornan legítimo di Rei Willem I, Prens di Oranje-Nassau, ta asumí monarkia via herensia.

Ora Rei fayesé, monarkia ta pasa via suseshon pa su desendientenan legítimo, ku prioridat pa e yu di mas grandi, i ku sustitushon konforme e mesun regla. Si no tin desendiente propio, monarkia ta pasa di mes manera pa e desendientenan legítimo di, na promé lugá su mayor, despues di su tawela òf wela, den e liña di suseshon, te asina leu ku nan parentesko ku e Rei difuntu no ta mas leu ku di tres grado.

Pa suseshon, ta konsiderá un yu di kua un hende muhé ta na estado momento ku Rei fayesé komo un yu nasí kaba. Si e nase morto, ta konsiderá ku nunka el a eksistí.

Renunsia na monarkia ta hiba na suseshon konforme e reglanan fihá den e artíkulonan anterior. Yu ku nase despues di e renunsia, i nan desendientenan, ta ekskluí for di suseshon.

1. Un Rei ku kontraé matrimonio sin e konsentimentu otorgá den lei ta renunsiá mediante tal akto na monarkia.
2. Si un persona ku por heredá monarkia di Rei kontraé matrimonio di tal manera, e mes, e yunan ku nase for di tal matrimonio i nan desendientenan ta ekskluí for di suseshon.
3. Staten General ta deliberá i tuma desishon den seshon konhunto riba proposishon di lei pa otorgá tal konsentimentu.

1. Ora sirkunstansia eksepshonal eksigí esei, por ekskluí un òf mas persona, mediante un lei, for di suseshon.
2. Entrega di e proposishon pa hasi esei ta tuma lugá pa òf na nòmber di Rei. Staten General ta deliberá i tuma desishon al respekto den seshon konhunto. Nan por aprobá e proposishon solamente ku por lo ménos dos terser parti di e votonan emití.

1. Si ta premirá ku lo no tin susesor, por nombra unu den lei. Entrega di e proposishon pa hasi esei ta tuma lugá pa òf na nòmber di Rei. Despues ku presentá e proposishon, ta disolvé e kámaranan. E kámaranan nobo ta deliberá i tuma desishon al respekto den seshon konhunto. Nan por aprobá e proposishon solamente ku por lo ménos dos terser parti di e votonan emití.
2. Si na momento ku Rei fayesé òf renunsiá na monarkia no tin susesor, ta disolvé e kámaranan. E kámaranan nobo ta reuní den seshon konhunto denter di kuater luna despues di e fayesementu òf renunsia, pa disidí tokante nombramentu di un Rei. Nan por nombra un susesor solamente ku por lo ménos dos terser parti di e votonan emití.

1. Ta solamente e desendientenan legítimo di un Rei nombrá por susedé Rei via suseshon hereditario.
2. E disposishonnan tokante suseshon i insiso unu di e artíkulo akí ta aplikabel analógikamente na un susesor nombrá, tanten ku e no ta Rei ainda.

Ora Rei kuminsá ehersé outoridat real, mas pronto posibel ta hurament’é i ta inougur’é na kapital, Amsterdam, den un seshon konhunto i públiko di Staten General. E ta hura òf primintí lealtat na Konstitushon i fieldat den kumplimentu di su kargo. Lei ta fiha regla adishonal.

Rei ta ehersé outoridat real solamente despues di a kumpli edat di diesocho aña.

Lei ta regla outoridat di mayor i tutela riba Rei menor di edat i e supervishon korespondiente. Staten General ta deliberá i tuma desishon al respekto den seshon konhunto.

1. Ora konseho di minister ta di opinion ku Rei ta inkapas pa ehersé outoridat real, e ta informá Staten General al respekto, presentando e konseho ku el a pidi Konseho di Estado pa tal propósito, i Staten General ta reuní despues den seshon konhunto.
2. Si Staten General ta kompartí tal opinion, nan ta deklará ku Rei ta inkapas pa ehersé outoridat real. Ta publiká tal deklarashon riba òrdu di presidente di e seshon i e ta drenta na vigor inmediatamente.
3. Asina ku Rei ta kapas pa ehersé outoridat real atrobe, ta deklará esei den lei. Staten General ta deliberá i tuma desishon al respekto den seshon konhunto. Inmediatamente despues di publikashon di tal lei, Rei ta reanudá ehersisio di outoridat real.
4. Si a deklará Rei inkapas pa ehersé outoridat real, lei ta regla supervishon riba su persona si ta nesesario. Staten General ta deliberá i tuma desishon al respekto den seshon konhunto.

Rei por entregá ehersisio di outoridat real temporalmente i reanudá tal ehersisio a base di un lei; entrega di e proposishon pa tal lei ta tuma lugá pa òf na nòmber di Rei. Staten General ta deliberá i tuma desishon al respekto den seshon konhunto.

1. Un regente ta ehersé outoridat real:
   1. tanten ku Rei no a kumpli edat di diesocho aña;
   2. si un yu ku no a nase ainda por ta yamá pa asumí monarkia;
   3. si a deklará Rei inkapas pa ehersé outoridat real;
   4. si Rei a entregá ehersisio di outoridat real temporalmente;
   5. tanten ku falta un susesor despues ku Rei a fayesé òf renunsiá na monarkia.
2. Ta nombra e regente den lei. Staten General ta deliberá i tuma desishon al respekto den seshon konhunto.
3. Den e kasonan menshoná na insiso unu, sub c i d, e desendiente di Rei ku ta su susesor probabel ta regente konforme derecho si el a kumpli diesocho aña di edat.
4. E regente ta hura òf primintí lealtat na Konstitushon i fieldat den kumplimentu di su kargo, den un seshon konhunto di Staten General. Lei ta fiha regla adishonal tokante regensia i por regla su suseshon i remplaso. Staten General ta deliberá i tuma desishon al respekto den seshon konhunto.
5. Artíkulo 35 i 36 ta aplikabel analógikamente na e regente.

Tanten ku no tin un areglo pa ehersisio di outoridat real, Konseho di Estado ta ehersé tal outoridat.

Lei ta regla ken ta miembro di kas real.

1. Anualmente, Rei ta risibí prestashon finansiero pa kuenta di Estado i konforme regla ku lo fiha den lei. E lei konserní ta determiná na ki otro miembro di kas real ta otorgá prestashon pa kuenta di Estado i ta regla tal prestashonnan.
2. E prestashonnan ku nan ta risibí pa kuenta di Estado, i tambe e elementonan patrimonial ku ta sirbi pa ehersisio di nan funshon, ta liber di impuesto personal. Ademas, loke Rei òf su susesor probabel atkerí for di un miembro di kas real via derecho di herensia òf via donashon ta liber di derecho di suseshon, transishon i donashon. Por otorgá mas eksenshon di impuesto den lei.
3. E kámaranan di Staten General por aprobá proposishon di e leinan na kua ta referí den e insisonan anterior solamente ku por lo ménos dos terser parti di e votonan emití.

Rei ta organisá su Kas, tumando na kuenta interes públiko.