Artíkulo 129: Elekshon di miembronan di Staten provinsial i munisipio; durashon di mandato; inkompatibilidatnan; votashon sin mandato

Artíkulo 129
  1. E hulandesnan residente di kada provinsia, respektivamente munisipio, ku ta kumpli ku e rekisitonan pa elekshon di Kámara di Representante di Staten General ta elegí e miembronan di konseho provinsial i di konseho munisipal direktamente. Pa membresia, e mesun rekisitonan ta konta.
  2. Ta elegí e miembronan a base di representashon proporshonal, denter di e márgennan ku lo fiha den lei.
  3. Artíkulo 53, insiso dos, i artíkulo 59 ta aplikabel. Artíkulo 57a ta aplikabel analógikamente.
  4. Periodo di seshon di konseho provinsial i konseho munisipal ta kuater aña, eksepto den e kasonan ku lo determiná den lei.
  5. Lei ta stipulá kua ta e funshonnan ku no por ehersé pareu ku membresia. Lei por stipulá sierto impedimentu pa membresia ku ta derivá di parentesko òf matrimonio, i ku realisashon di sierto akto indiká den lei por hiba na pèrdida di membresia.
  6. E miembronan ta vota sin risibí instrukshon obligatorio.

Eksplikashon

Tene na kuenta: solamente e vershon na hulandes di Konstitushon tin balides. 

E rekesitonan pa e derecho di voto aktivo i pasivo pa e konsehonan provinsial i e konseho munisipal ta mesun kos ku esunnan pa e Kámara di Representante. Komo kondishon adishonal sí ta konta ku e persona ku tin derecho di voto ta biba den e provinsia òf munisipio konserní.

E konsehonan provinsial i e konseho munisipal ta wòrdu elegí kada kuater aña a base di representashon proporsional. Reemplaso temporal pa motibu di embaraso ta posibel.

Lei ta stipulá kua funshon no por ehersé pareu ku membresia di konseho provinsial òf konseho munisipal. Lei por stipulá impedimentu pa membresia pa motibu di parentesko òf matrimonio, i ku realisashon di sierto akto indiká den lei por hiba na pèrdida di membresia.