Artíkulo 82: Entregamentu di proyektonan di lei; inisiativa

Artíkulo 82
  1. Entrega di proposishon di lei por tuma lugá pa òf na nòmber di Rei i dor di Kámara di Representante di Staten General.
  2. Entrega di proposishon di lei ku ta rekerí tratamentu den seshon konhunto di Staten General por tuma lugá pa òf na nòmber di Rei i, te asina leu ku e artíkulonan korespondiente di kapítulo 2 ta permití esei, dor di e seshon konhunto.
  3. Un òf mas miembro ta someté proposishon di lei na Kámara di Representante, respektivamente na e seshon konhunto, pa e kámara òf e seshon konhunto entregá esakinan.

Eksplikashon

Tene na kuenta: solamente e vershon na hulandes di Konstitushon tin balides. 

Proposishonnan di lei por wòrdu entregá pa gobièrnu i pa Kámara di Representante. Esaki di último aki ta wòrdu yamá e derecho di inisiativa.

E derecho di inisiativa ta reglá di tal manera ku un òf mas miembro di Kámara di Representante, e inisiadónan, ta ofresé un proposishon di lei den Kámara di Representante pa tratamentu. Esaki ta wòrdu yamá 'hasi pendiente'. Kámara di Representante ta trata e proposishon di lei den presensia di gobièrnu. E inisiadó òf inisiadónan ta defendé e proposishon. Despues Kámara di Representante ta desidí si e proposishon ta wòrdu entregá. Si desidí esaki, e ora ei Kámara di Representante ta manda e proposishon di lei pa Senado (artíkulo 85).

Den algun artíkulo di e parágrafo tokante e Rei ta mensioná legislashon pa kual tratamentu den reunion konhunta ta obligatorio. Meskos e ora ei e derecho di inisiativa ta konta, sakando si den e artíkulo ei ta pará ku un tal proposishon di lei por wòrdu entregá únikamente pa gobièrnu (na nòmber di rei). Un ehemplo di esaki ta artíkulo 29.

Senado no tin e derecho di inisiativa.