Artíkulo 68: Deber di informashon di ministernan, sekretarionan di Estado; interpelashon
E ministernan i e sekretarionan di estado ta duna e kámaranan, tantu separadamente komo den seshon konhunto, verbalmente òf por eskrito, e informashon ku un òf mas miembro pidi, te asina leu ku dunamentu di tal informashon no ta kontra interes estatal.
Eksplikashon
Tene na kuenta: solamente e vershon na hulandes di Konstitushon tin balides.
E derecho di kòntrol mas importante di Segunda i Prome Kamara ta e derecho di kada miembru individual di Kamara pa obtiene informashon di minister- i sekretarionan di Estado via pregunta. Minister- i sekretarionan di Estado ta obligá pa duna e informashon pidi oralmente òf pa skrito.
Solamente si duna informashon por perhudiká interes di Estado, por hasi un eksepshon riba esaki. Por pensa riba informashon sensibel tokante enkargo di gobièrnu na kompanianan òf informashon den kuadro di kombatimentu di terorismo. Informashon por wordu duna konfidensialmente tambe. Esei ta e kaso por ehemplo serka e komishon pa servisionan di inteligensia i seguridat.
E derecho di informashon ta konta pa tur pregunta ku wordu hasí, por ehemplo den debate òf durante e preparashon pa skrito di e tratamentu di proposishonnan di lei.
Ademas, e Kamaranan tin den nan reglamento di òrdu areglonan pa hasi i kontestá pregunta pa skrito, pa e derecho di interpelashon i pa e derecho di investigashon (enkuesta). Semanalmente miembrunan di Segunda Kamara por hasi pregunta oralmente durante un ora tokante temanan aktual durante e asina yamá ora di pregunta.