Artíkulo 55: Elekshon di Senado
- E miembronan di konseho provinsial i e miembronan di e kolegionan elektoral na kua ta referí den insiso dos i den artíkulo 132a, insiso tres, ta elegí e miembronan di Senado. Eksepto den kaso di disolushon di Senado, ta tene e elekshon denter di tres luna despues di elekshon di e miembronan di konseho provinsial.
- Na benefisio di e hulandesnan ku no ta residente i ku ta kumpli ku e rekisitonan pa elekshon di Kámara di Representante di Staten General, ta tene elekshon pa un kolegio elektoral pa Senado. Tal hulandesnan ta elegí e miembronan di e kolegio elektoral ei direktamente. Pa membresia, e mesun rekisitonan ta konta. Artíkulo 129, insiso dos te ku seis, ta aplikabel analógikamente.
Eksplikashon
Tene na kuenta: solamente e vershon na hulandes di Konstitushon tin balides.
E Senado ta wòrdu skohe
- pa e miembronan di konsehonan provinsial
- pa e islanan ku no ta klasifiká komo provinsia den Hulanda Karibense pa e miembronan di un kolegio elektoral
- pa e personanan ku tin derecho di voto ku ta biba den exterior i ku tambe mag di vota pa Kámara di Representante (no-residentenan) meskos tambe pa un kolegio elektoral (insiso 2).
E elekshon mester tuma lugá, ekseptuá despues di disolushon interino di Senado, dintra tres luna despues di e elekshonnan pa konsehonan provinsial.
E durashon di e periodo di seshon di konsehonan provinsial ta kuater aña, ekseptuá pa eksepshonnan ku mester wòrdu determiná pa lei (artíkulo 129, di kuater insiso). Si e legislador hasi uzo di e posibilidat akí, e durashon di e periodo di seshon di Senado ta wòrdu adaptá na e durashon mas largu òf mas kòrtiku di e periodo di seshon di konsehonan provinsial (artíkulo 52 insiso 2).
Sin embargo, si ta desviá di e durashon normal di e periodo di seshon pa un òf algun provinsia so, por ehemplo ora di un re-klasifikashon provinsial, no ta nesesario pa tin ningun ekstenshon òf akortamentu di e durashon di e periodo di seshon i ningun elekshon interino di Senado.
E derecho di voto pa Senado ta reglá den Kieswet.